I de Zit um die häilige Tääg ume sind heftigi Stürm käi Sälteheit. D Lüt säged dänn als: Die Wild Jagd faari übers Land.
Zum eerstemool ha n i als chliine Bueb devo ghöört prichte. A äim vo dene früehne, feischtere Novemberobige isch es gsi, wo sich im Winter scho bezite feischter und ahnigsvoll über d Landschaft legged und der erschti Schnee s Loch zuemacht wie mer ännet em Rhy im Schwarzwald säit.
D Hustüre sorgsam verriegled und d Fäischter fescht verschlosse, simmer i der waarme Stube ghöckled. S Füür im Ofe hät luschtig knischtered und de Chouscht i der Stube zünftig ighäizt.
S Guggerzytli a der Wand; Tigg Tagg, Tigg Tagg hed langsam und gliechmässig d Stunde vor sich anezällt, wie wänns de Mäntsche i de Stube hed welle d Läbenszit uusrächne.
Und wie mer so fridlich do sitze und öisne Gedanke nooche hanged, ghöör ich dusse uf äinisch es Chnuuschte und es Grochse. Es hed bigoscht töönt, wie wänn e Moore mitere Chuppele Fäärli dur d Luft dur z flüüge chèèm, und es Toose und es Bruuse isch über s Huus zoge, as es d Schindle vom Dach gschränzt und em groosse Nussbaum vor em Huus en Ascht abträit hed.
Do hed de Grossvati uf z mool gsäit: Los nur, wie s jetzt dusse lätz duet! Esoo isch es wänn die Wild Jagd chunnt. Ghörsch wie de Wind gòòt? S joomered, als wäred alli Toote uf em Gottesacker uufgstande. Jo, s Wuetisheer faart über d Wält und mit ihm d Frau Holle und alli arme Seele. Gott gebne die eewig Rueh. Sie faared dur d Nacht und dur de Wind in d Eewigkeit.
Und dänn isch s Grosmueti i d Chuchi gange und hed aagfange im Chuchischaft chraame. Denoo isch sie vor d Huustüre use gange, und hed Mehl und Salz in Wind gströit zum das Tooteheer Fuettere.
Jo,
s isch en unbestimmti Zyt
s isch Winterszyt
I dene Taage hänked die Alte ihri Wösch nììd voruse. Sie wüssed : wänn die Wild Jagd es Chleidigsstuck mit sich mitnimmt, so bechonnt sie Macht über de Bsitzer und er muess scho bald sälber mit de Wilde Jagd mitfaare.
Am friitig am 9.dezembär fahrt s wuetisheer öppä am 20.00 ziit
AntwortenLöscheni form vo spräggälä über ottebach a de rüss her. nuno z ottebach wird de bruuch gfiiret.
Känn ich vo früehnere Zite her, wo n ich no gschneller ha chönne ränne :)
Löschen