Der brennende Mann

1

Wänn d Chlingnauer hüt über d Aare wänd, so benutzed sie für gwönlich d Brugg in Döttige. No vor hundert Jòòr isch mer aber direkt vo de Machme mit de Fääri übere is Chilspemer Fäld gfaare. Drumm händ sich zwee Fäärmanne deet e Hütte ane pout, zum sich gege Wätter und Nachtfroscht zschütze.

Äinisch sind sie am Wienachtsobig i irem Hüttli ghocked und händ plauderet, wärend dusse Schnee, Sturm und Räge geg s Fäischter peitscht hed. Do heds e gueti Stund nach em Nachtässe a d Türe gchlopfed.

Si mached uuf, aber wie sinds verschrocke; vorusse isch en brännende Maa gstande wo augeblicklich hed welle übere gsetzt werde. Das Chnochegrüscht, wo Flamme us de Auge und us de Bruschthööli gschlage sind, hed nüüt guets lo vermuete lòò. Aber d Fäärimanne händ gwüsst, ass mer am häilig Obig au de bööse Gäischter d Überfaart nììd verweigere törf.

Also händs de Mantelchraage uegschlaage und beed sinds hinter dem Chnochegrüscht in Wäidlig gchlättered und händ still aafòò ruedere. Mittst uf de Aare aber hed de Füürmaa aafòò Funke schlòò und e Hitz vo ihm uusgange, ass dene zwee Fäärmanne de Schweiss unter de Pelzchappe abetropfed isch.

Sie sind froo gsii wo de unheimlich Gascht uf de andere Siite wieder uusgstigen isch. Er aber hed warnend gsäit: «All drüü sind mir verloore, wänn ihr nììd Schlag nüüni wieder do sind und mich übere holed.» Dänn isch er im Hardwald verschwunde.

Was händs welle mache? Punkt Nüüni händs wieder änne am Steeg gwartet und wie us em Nüüt isch de Brännend wieder im Waidlig gstande. Uf de Machmer Siite hed er sich bedankt und hed ihne d Hand heegstreckt. Gschnell hed de Älter vo dene Fäärmaa dem Brännende Maa sis Rueder here ghebt. Zum Glück für die beide, wo das Gschpängscht das Rueder ghebt hed isch es ganz glüig worde. Gschnell heds de Fäärmaa is Wasser ghebt, de Brünnling aber isch scho uusgstige gsii und im Giritz verschwunde.

S Rueder händ die beede Fäärmanne nümme pruucht. Sie händs zum Gedenk a die Wienacht uufphalte, dänn all föif Finger vom Füürmaa händ sich drinie prännt ghaa.