S` Gschìchtli vo de dicke fette Omelette

S` Gschìchtli vo de dicke fette Omelette

Es sind emòòl drüü alti Fraue gsy, wo gern händ welle Omelette ässe. Da hed die eerscht es Äi dezue gää, die zwöit Milch und die dritt Fett und Mèèl.

Wo die dick fett Omelette fertig gsy isch, isch si i de Pfanne uufgstande und isch dene drüü alte Fraue devoo grännt. Isch grännt und grännt, katapper, katapper, und isch bis zum Waldrand grännt. Do isch es Hääsli gsy und das hed grüefft: „Dicki fetti Omelette blyb stòò, ich will die frässe!“ Aber d` Omelette hed grüefft: „Ich bi drüü alte Fraue devoo grännt, dänn chan i au dir Hääsli Wippschwanz devoo laufe!“ Und isch, katapper, katapper, grad in Wald ine grännt. Do isch en Wolf z laufe choo und hed grüefft: „Dicki fetti Omelette blyb stòò, ich will di frässe!“ Und d` Omelette hed gsäit: „Ich bi drüü alte Fraue devoo grännt und im Hääsli  Wippschwanz, dänn chan i au dir Wolf Dickschwanz devoo laufe!“ Und isch, katapper, katapper, no tüüffer in Wald ine grännt. Do isch es Ree z springe cho und hed grüefft: „Dicki fetti Omelette blyb stòò, ich will di frässe!“ D` Omelette aber hed gsäit: „Ich bi drüü alte Fraue devoo grännt, im Hääsli Wippschwanz und im Wolf Dickschwanz, dänn chan i au dir Ree Blitzschwanz devoo laufe!“ Und isch, katapper, katapper, wider zum Wald uus grännt. Do isch e Chue gstande und hed gsäit: „Dicki fetti Omelette blyb stòò, ich will di frässe!“ D` Omelette aber hed gsäit: „Ich bi drüü alte Fraue devoo grännt, im Hääsli Wippschwanz, im Wolf Dickschwanz und im Ree Blitzschwanz, dänn chan i au dir Chue Schwippschwanz devoo laufe!“ Und isch, katapper, katapper, is Doorf abe grännt. Do isch e Sou hère z fääge choo und hed grüefft: „Dicki fetti Omelette blyb stòò, ich will die frässe !“ Aber d` Omelette hed gsäit: „Ich bi drüü alte Fraue devoo grännt, im Hääsli Wippschwanz, im Wolf Dickschwanz, im Ree Blitzschwanz und de Chue Schwippschwanz, dänn chan i au dir Souhuuffe devoo  laufe!“

Und isch, katapper, katapper, d` Stròòss duraab grännt. Do sind drüü Chind dethèèr choo, die händ kän Vater und käi Mueter mee ghaa und händ gsäit: „Liebi Omelette blyb stòò! Mir händ de ganz Taag no nüüt ggässe !“

Do isch die dick fett Omelette, de Chind in Choorb gumpt und hed sich vo ine lo uufässe.

Und iez isch d` Omelette ggässe und Gschìcht fertig.

Bearbeitet und übersetzt von Jürg Steigmeier

Deutsche Märchen seit Grimm Seite 176